Sasi. T.A

ദൈവം ആദ്യമൊക്കെ മരണത്തെ
ഒരാള്‍ക്ക് കൊടുക്കുക
പുതിയൊരു വസ്ത്രം നല്‍കുക
എന്നതു പോലെയായിരുന്നു.

ജീവികള്‍ പെരുകിയതോടെ
ഓരോരുത്തര്‍ക്കും
പുതിയതായി മരണത്തെ കൊടുക്കുക
അസാദ്ധ്യമായിത്തുടങ്ങി.

ഒരാള്‍ക്ക് കൊടുത്ത മരണത്തെ
തിരിച്ചെടുക്കുക അസാദ്ധ്യവുമാണല്ലൊ..
എങ്കിലും എല്ലാം അറിയിക്കുന്ന
ദൈവം ഇതു മാത്രം ഇന്നു വരെ
മനുഷ്യനെ അറിയിക്കാതെ
ഒരാളുടെ മരണശേഷം
തിരിച്ചെടുക്കുവാനും
വസ്ത്രങ്ങള്‍ പോലെ
അലക്കി വെളുപ്പിച്ച്
വീണ്ടും വീണ്ടും
ഉപയോഗിക്കുവാനും തുടങ്ങി.

പലര്‍ക്കും മറ്റുള്ളവര്‍ക്കു
കൊടുത്ത മരണം തന്നെയാണ്
തനിക്കും കിട്ടിയതെന്ന അറിവില്ലാതായ്...

ദൈവം എനിക്കു തരുന്ന മരണം
പഴയതാണാവോ?
ദൈവത്തിനല്ലാതെ
ആര്‍ക്കറിയാം ?