Ajith
പ്രാര്‍ത്ഥനയുടെ കൈക്കുമ്പിളില്‍
വിത്തുകളുണ്ട്‌ - മോഹങ്ങളുടെ
കൈരേഖയുടെ ഞാഞ്ഞൂലുകള്‍ പുളയുന്ന
മണ്ണില്‍ വിളയാനായ്‌
വിയര്‍പ്പില്‍ കുതിരുന്നത്‌

പൊട്ടിത്തെറിക്കുന്ന വെണ്ടയാവാം
കയറോടുന്നത്‌ നോക്കിക്കിടക്കുന്ന കാളയാവാം
കര്‍പ്പൂരനാളത്തിനു മുന്നില്‍
മഞ്ഞളും കുങ്കുമവുമണിഞ്ഞ
വിഡ്ഢിക്കൂശ്മാണ്ഡമാവാം
പാവയ്ക്കയുടെ മുതലക്കുഞ്ഞുങ്ങളാവാം
തെങ്ങിന്‍തടത്തില്‍ ചിക്കിപ്പെറുക്കുന്ന
ചീരക്കാലുകളാവാം
ആത്മഹത്യചെയ്യുന്ന പടവലങ്ങളാവാം

ഏതായാലും അടുത്ത വരവിന്‌
ഇതിലേതെങ്കിലും കൂട്ടി ഉണ്ണാം
പോവാന്‍ കൈ കൂപ്പുമ്പോള്‍
വീണ്ടും തരാം
പുതിയ വിത്തുകളുടെ പ്രസാദം.