Ajith
ഒരു തത്ത പറന്നുപോയാല്‍
കണ്ണില്‍ തങ്ങിനില്‍ക്കുന്ന പച്ചയാണ്‌
തിരൂര്‍

തലക്കടത്തൂര്‍നിന്ന്‌
കൂട്ടായി കടല്‍മുഖത്തേയ്ക്ക്‌
പുളയുന്ന തിരൂര്‍പ്പുഴ
കുളവാഴയുടെ പച്ച

ചുവന്ന ചുണ്ടായ്‌ മാറാന്‍
മറുനാട്ടിലേയ്ക്കു റെയില്‍വണ്ടി കാത്ത്‌
പ്ലാറ്റ്ഫോമില്‍ വട്ടമിട്ടിരിക്കുന്ന
വെറ്റിലത്തളിര്‍പ്പച്ച

ദൂരെമാറി, തുരുമ്പിച്ച വാഗണില്‍
ശ്വാസത്തിന്റെ ഒരാകാശം നിറച്ച്‌
ഓര്‍മ്മകളുടെ പൂപ്പല്‍പ്പച്ച

കടലൊന്നിരമ്പി ഈ നഗരം ചുറ്റുന്നേരം
നുരയും തിരകള്‍,
കൊടിക്കൂറകള്‍ പച്ച

പുറത്തൂര്‍ കര നിന്ന്‌ നോക്കുമ്പോള്‍
മക്ക നോക്കി നമസ്കരിക്കും
പൊന്നാനി ഒരു പച്ച

അക്കരപ്പച്ചകള്‍ ചിറകാര്‍ന്ന്‌
പറന്നുവന്ന്‌ കൊത്തുമ്പോള്‍
ഒരുനാള്‍ മാത്രം മധുരിക്കാന്‍
തെഴുക്കും കാഞ്ഞിരപ്പച്ച.