Sunil Salam
ഏതു നിമിഷവും
പ്രത്യക്ഷപ്പെട്ടേക്കാവുന്ന
ഒരഗാധ ഗര്‍ത്തമുണ്ട്‌
എന്റെ കൂടെ

ഭൂമിയുടെ മറുക്‌ പോലെ
അതെപ്പോഴും
പ്രകാശമില്ലാത്ത ചെറിയൊരിടം
എനിക്കായ്‌ കാത്തുവെച്ചു

മുന്നിലും പിന്നിലുമായ്‌
ഒളിഞ്ഞും പാത്തും
നിഴലുപോലെയുള്ള
തുടര്‍ച്ച
പ്രണയിതാക്കളാക്കി
ഞങ്ങളെ


ശിശിരവും വസന്തവും
ഗ്രീഷ്മവും
മഞ്ഞും നിലാവും മഴയും
കടന്നുപോയി
ഞങ്ങള്‍ക്കിടയിലൂടെ


ഒരു ചിലന്തി
വല നെയ്യും പോലെ
പിന്നിട്ട ദൂരങ്ങളിലെല്ലാം
ഇഴകളുടെ അവശിഷ്ടങ്ങള്‍
ബാക്കിയാക്കി
പിന്തുടര്‍ന്നു

തെന്നി വീഴുമെന്ന്
തോന്നിയ നേരത്തും
അഗാധമായ ആഴങ്ങളുടെ
തണുപ്പാഗ്രഹിച്ച
നിമിഷങ്ങളിലുമെല്ലാം
പിടി തരാതെ
തെന്നിമാറിക്കൊണ്ട്‌
പക്ഷേ ഏതു നിമിഷവും
പ്രത്യക്ഷപ്പെട്ടേക്കാവുന്ന ഭീതിയില്‍
എന്റെ കൂടെത്തന്നെയുണ്ട്‌

കൂടുതല്‍ കവിതകള്‍