Kannan S
തുരുമ്പിച്ച തകരത്തകിടുകള്‍
കൂട്ടിയിട്ടിരിക്കുന്നു
അവിടെവച്ച് ഞാനയാളെ കണ്ടു

മൂന്നു പട്ടികള്‍ നിര്‍ത്താതെ കുരയ്ക്കുന്നു
ആ വെളുത്ത പല്ലുകളുടെ ഓര്‍മ്മയിലിരുന്ന്
അയാള്‍ പറഞ്ഞതെല്ലാം കേട്ടു
കൊലയാളികളിലൊരാള്‍

അവര്‍ നാലുപേരുംകൂടി
കാത്തിരുന്ന് നോക്കിവെച്ച്
അവനെ കൂട്ടിക്കൊണ്ടുപോയി

ഒരു കടമുറിയുടെ ചായ്പ്
കട്ടിളപ്പടിയില്‍നിന്നവന്‍ കാലും തൂക്കിയിട്ടിരുന്നു
തര്‍ക്കിച്ചുകൊണ്ടിരുന്നു

പിന്നില്‍ക്കൂടിച്ചെന്ന്
തോളെല്ലിന്റെ കുഴിവില്‍ക്കൂടി
കുടക്കമ്പി താഴ്ത്തിവിട്ടു

നിലവിളിച്ചില്ലെന്നുവേണം
പറഞ്ഞതില്‍നിന്നു കരുതാന്‍
കുതറിയില്ല
എതിര്‍ത്തില്ല
ഒന്നു കിടക്കണമെന്നു പറഞ്ഞു
അവര്‍ നാലുപേരും കൂടി
എടുത്തു കിടത്തി

മടക്കിക്കുത്തിയ മുണ്ടുകള്‍ക്കുതാഴെ
തെറിച്ചുനില്‍ക്കുന്ന മുട്ടുകള്‍ക്കു മുന്നില്‍
കാലുകള്‍ക്കു നടുവില്‍
ആ കിടപ്പ് ആര്‍ക്കും സങ്കല്‍പ്പിക്കാം

കുടിയ്ക്കാന്‍ വെള്ളം വേണമെന്നു പറഞ്ഞു
അവര്‍ അതും കൊടുത്തു

ടി വിയില്‍ ചര്‍ച്ച
കോണ്ടലിസാ റൈസും നൂറുല്‍ മാലിക്കിയും
ഈജിപ്തിലെ റിസോര്‍ട്ടില്‍
ഇറാഖിന്റെ നിര്‍മ്മാണത്തെക്കുറിച്ച്

ഞാനിതോര്‍ത്തു
നിങ്ങളോടു പറയുന്നു.