Wilson Kuzhur
ആ കിയോസ്കിന്റെ പുറകില്‍
ഒരു ഈന്തപ്പനയുണ്ട്‌.
ദിവസവും
എട്ടോ ഒമ്പതോ പ്രാവശ്യം
അതിനു ചുവട്ടില്‍നിന്നാണ്‌
സിഗരറ്റു വലിയ്ക്കുക.
പതുക്കെപ്പതുക്കെ
ആയിടം സ്വന്തമായിത്തീര്‍ന്നതുപോലായി.
ഇന്നിപ്പോള്‍ ഒരുനേരത്ത്‌ ചെല്ലുമ്പോള്‍
അതാ അവിടെ
സിഗരറ്റുമായി വേറൊരാള്‍.
എന്തുപറയും അയാളോട്‌,
ആ ഇടം എന്റേതാണെന്നോ?
സിഗരറ്റുകുറ്റികള്‍
തൂപ്പുകാര്‍ കളഞ്ഞിരിക്കുന്നു.
ഈന്തപ്പനയോലകള്‍
താഴോട്ടു തൂങ്ങിനില്‍പുണ്ട്‌.
(ഇന്നാണ്‌ ആദ്യമായി
അതു കാണുന്നത്‌.)
എല്ലാം ആദ്യമായി കാണുംപോലെ
എന്റേതായി എന്തുണ്ട്‌ അവിടെ?