Wilson Kuzhur
രാവിലത്തെ നടത്തം കഴിഞ്ഞ്‌
നടന്നു താനേ മടങ്ങുമ്പോള്‍
ചായക്കടയില്‍നിന്ന്‌ രണ്ടു പഴം വാങ്ങി.

പഴംതിന്നുമ്പോള്‍
അതു കൃഷിചെയ്തയാളെ
ഭാവനയില്‍ വരച്ചുനോക്കി.

ഞാനിപ്പോള്‍ തിന്നുന്ന
പഴത്തിന്റെ കൃഷിക്കാരന്‍
ഇപ്പോള്‍ എവിടെയായിരിക്കും?

അയാള്‍ ഉറങ്ങുകയാവുമോ
കൃഷിചെയ്യുകയായിരിക്കുമോ
അയാള്‍ ഇപ്പോള്‍ ഉണ്ടാകുമോ?

കൃഷിക്കാരനെ ഓര്‍ത്തപ്പോള്‍
കൃഷിക്കാരനായിരുന്ന
അപ്പനെ ഓര്‍മ്മ വന്നു.

കഷ്ടം!

ഒരു പഴം വേണ്ടിവന്നു
ഈ തെറിച്ചവിത്തിന്‌
സ്വന്തം കൃഷിക്കാരനെ
ഓര്‍മ്മിക്കുവാന്‍!