Vinod. T.P
പ്രായമാവുന്നതിനോടൊപ്പം
പാകതയാവുകയും മറ്റും ചെയ്തിരിക്കാവുന്ന
ഇപ്പോഴത്തെ ജീവിതത്തില്‍
സൌഖ്യംതന്നെ നിനക്കെന്ന്
വിചാരിച്ചുകൊള്ളട്ടെ.

പ്രായമാവുന്നതിനോടൊപ്പം
ചൂടാറുകയും മറ്റും ചെയ്യുന്ന
ഇപ്പോഴത്തെ ജീവിതത്തിനിടയിലും
ഇന്നലത്തെ ഉറക്കം തിളച്ച്
എനിക്കൊരു സ്വപ്നമുണ്ടായി.

സ്വപ്നത്തില്‍ നീ
എന്നെ മറന്നുപോയെന്ന്
പറയുന്നുണ്ടായിരുന്നു.

അന്നേരമെന്താണ്
തിരിച്ചു ഞാന്‍ പറഞ്ഞതെന്ന്
അറിയുവാന്‍ മാത്രമാണ്
ഇപ്പോള്‍ ഈ എഴുത്ത് ;

അവനവനെപ്പറ്റിയുള്ള
അസഹ്യമായ ജിജ്ഞാസയില്‍,
നിനക്കറിയാവുന്നത് പോലെ.