Muhammed Kaviraj
പഴയ സോവിയറ്റ് നാടിന്റെ
കടാലാസു കൊണ്ട്
അന്നു ഞങ്ങള്‍ വിമാനമുണ്ടാക്കി പറത്തുമായിരുന്നു.

അന്നൊരിക്കല്‍
അമ്മാവന്‍ വന്നപ്പോള്‍
റഷ്യന്‍ വാച്ചു കൊണ്ടു വന്നു.
കീ കൊടുക്കുന്ന വാച്ചായിരുന്നു അത്.

ഇതഴിച്ചെടുത്താല്‍ പട്ടാമ്പിയിലാകെ
സ്പ്രിങ്ങു കൊണ്ട് നിറയുമെന്ന്
ഹാരിസ് പറഞ്ഞു.

ലോകത്തിലെ സകല യന്ത്രങ്ങളും
സ്വപ്നം കാണുന്ന അവന്‍‍
ഞങ്ങളുടെ സ്കൂട്ടര്‍ നന്നാക്കിയെടുത്തു.

ഒരിക്കല്‍,
പെട്രോളില്ലാത്ത കാലത്ത്
പത്താം നമ്പര്‍ വീട്ടിലെ
എഞ്ചിനീയറുടെ ബൈക്കില്‍ നിന്നും
എണ്ണ ഊറ്റുമ്പോള്‍
കയ്യോടെ പിടിക്കപ്പെട്ടു.

കൈ വിറച്ച്
വെയിലില്‍ ചെന്ന് ഇടിച്ചു തെറിക്കുമ്പോള്‍
എവിടെ നിന്നോ കേട്ട ഗ്ലാസ്നോസ്റ്റും പെരിസ്ട്രോയിക്കയും
പെട്ടെന്ന് എനിക്ക് ഓര്‍മ വന്നു.

സ്കൂട്ടറിന്റെ കേടു തീര്‍ക്കാന്‍
വാച്ചു വിറ്റ് മടങ്ങുമ്പോള്‍
റാ... റാ... റാസ്പുടിന്‍
ലവര്‍ ഓഫ് ദ റഷ്യന്‍ ക്യൂന്‍
എന്ന് ഞങ്ങള്‍ ഉറക്കെപ്പാടി.