Nazeer Kadikkadu
നൂറ്റിയറുപത് വില്ലകള്‍ക്കിടയിലെ
ഇടവഴിയില്‍ കുനിഞ്ഞിരുന്ന്
കരയുന്നതെന്തിനാടാ ഫക്രുദ്ദീനേ

പണിതീരാത്ത വില്ലകളുടെ
ജനാല തുറന്ന്
മഴയും കുട്ടികളും പുറത്തേക്ക് ചാടുമ്പോള്‍
നെഞ്ചത്തടിക്കുന്നതെന്തിനാടാ ഫക്രുദ്ദീനേ

ഒട്ടകങ്ങള്‍
വെയില്‍ തിന്ന് പള്ള വീര്‍പ്പിച്ച്
പലായനത്തിന്റെ കഥ ചുമന്നെത്തുമ്പോള്‍
മുഖം മണലില്‍ പൂഴ്ത്തുന്നതെന്തിനാടാ ഫക്രുദ്ദീനേ

ഭൂമി പിളര്‍ന്ന്
ആറടി മണ്ണ് നാട്ടിലേക്കയച്ചവനേ,
ഫക്രുദ്ദീനേ

മണലഴിച്ചതില്‍
വറ്റിക്കരിഞ്ഞു പോയ മഴയുടെ വേരുണ്ടായിരുന്നെടാ
ഒട്ടകങ്ങളുടെ കാല്പാടുകളുണ്ടായിരുന്നെടാ
പാതി പണിഞ്ഞ വില്ലകളുടെ അനക്കങ്ങളുണ്ടായിരുന്നെടാ

പകുത്ത് തീര്‍ന്നില്ലെടാ,
ഫക്രുദ്ദീനേ
മണ്ണേ...