Ajith
ചെറിയചെറിയ പണികളായിരുന്നു അയാള്‍ക്ക്
കുളക്കടവില്‍നിന്നും കൊണ്ടുവരുന്ന ചേലയിലെ
കുറുക്കന്‍പുല്ലുകള്‍ നുള്ളുക
നിറങ്ങള്‍ നിറച്ചു ചീറ്റിക്കാന്‍
പീച്ചാംകുഴല്‍ വൃത്തിയാക്കിവെക്കുക
ഓട്ടവീണ മണ്‍കലങ്ങള്‍
ചക്കപ്പശ ചേര്‍ത്തൊട്ടിക്കുക
ചാണകത്തില്‍ പുതഞ്ഞുപോവുന്ന ഓടക്കുഴല്‍
കഴുകിത്തുടച്ചു വെയ്ക്കുക
അങ്ങനെ.. അങ്ങനെ...

അനുരാഗത്തില്‍
ഹൃദയമൃദംഗമായ് പൊന്തിവിടരുന്ന
പാവാടയിലേയ്ക്ക്
ചാടൊല്ലെ.. ചാടൊല്ലെ എന്ന്
പറയാനാഞ്ഞ് പറയാനാവാതെ
നില്‍ക്കുകയായിരുന്നു

അയാളെ വീണ്ടും കണ്ടു
കമാനങ്ങളിലും പുല്‍ത്തകിടികളിലും
രാഗ് കാംബോജ് തുള്ളിയിട്ട തണുത്ത രാത്രിയില്‍
ഒരു ചുവര്‍ച്ചിത്രത്തില്‍
പല്ലക്കേന്തിനടക്കുന്ന ആളുകളുടെ കൂട്ടത്തില്‍
തലകുനിച്ചുനടക്കുന്ന ഒരാള്‍.