Abhirami
കൃഷിയാപ്പീസില്‍
ക്യൂനിന്നു മടുത്താണ്
കുരു കിട്ടിയത്

മൂപ്പു മണത്തതിനാല്‍
മണ്ണന്വേഷിച്ച് കുമാരന്‍
കുന്നു കയറി

പെയ്തൊഴിയാത്ത മഴക്കാലം
പാതി തിന്ന റോഡിനു കൂട്ടിരിക്കാന്‍
കുന്നു പോയിരുന്നു

എണ്ണ തേച്ച ഇടവഴിയില്‍
ഇടംതേടി ചെന്നപ്പോള്‍
സിഗ്നല്‍ തണലായിരുന്നു

വഴിയറ്റ്, പള്ളിപ്പറമ്പിലെ
പറങ്കിച്ചുവട്ടിലണഞ്ഞപ്പോള്‍
ഇനിയും തലപൊക്കാന്‍
വെളിച്ചം കാത്തു കഴിയുന്ന
വിത്തുകളായിരുന്നു

മണ്ണുകിട്ടാതെ
മനംമടുത്ത കുമാരന്‍
വായ മാന്തിത്തുരന്ന്
കുരു ഉള്ളിലേക്കിട്ട്
മണ്ണില്‍ മലര്‍ന്നുകിടന്നു

മുള പൊന്തി തളിരിട്ട്
കായ്ചു പടരുന്ന കാഴ്ച കാണാന്‍

കൂടുതല്‍ കവിതകള്‍