Smitha Meenakshi
ചങ്ങാതി പറയുന്നു,
ഏറെ നാള്‍ മുഖാമുഖം നിന്നാല്‍
രണ്ടു ചുവരുകള്‍ പോലും 
പ്രണയത്തിലായിടും,
ഒരുവേള, 
ഹൃദയം തപിക്കുമൊരു നിമിഷത്തില്‍
ആശ്ലേഷം കൊതിച്ചീയിടനാഴി 
ഭേദിച്ചൊന്നൊന്നോടു ചേര്‍ന്നുവെന്നും വരാം.
 
സത്യമൊ?
പിന്നിട്ട കാലമത്രയും ഞാനുമീജീവിതവും
മുഖാമുഖം നില്‍ക്കയായിരുന്നു,
പുഞ്ചിരിക്കാന്‍ ശ്രമിച്ചും 
ഹസ്തദാനത്തിനു വിരല്‍  തരിച്ചും...
തമ്മില്‍ പരിചയമാകാന്‍ കൊതിച്ചും...
എങ്കിലും
ഇനിയുമറിഞ്ഞില്ല പരസ്പരം
പ്രണയത്തിലേയ്ക്ക് മിഴിയടച്ചതുമില്ല...
 
പറയുക,
ഒടുവിലൊരുനാള്‍
ഒരു പ്രണയകുതിപ്പായി
എന്നിലേയ്ക്കാഴ്ന്നിറങ്ങുമീ 
ജീവിതമെന്നോ?